تعودنا عليك يا شمس

من طرف زايد السبت 20 فبراير 2010, 6:40 pm

تعودنا عليك يا شمس

يومية تطلي علينا

عيونك بتحاكينا همس

بتفهم شو بدها عنينا

دخلك لا تقسي علينا

تغيبي دوم وتنسينا

ما بصدق يوم بصدرك قلب

شي مرة بيغدر فينا

يوم ال طليتي قلنا

الدنيا صارت محلاها

وعن هالأيام سألنا

مين الكان مخباها

شي قالوا..

ورا الغيمات

كانت تتخبا البسمات

وشي قالولي..

كانت هون

وحبا كان مجافينا

لا تقولي بالصيفية

انو منك ملينا

تروحي تغيبي شتوية

ونقعد نفرك ايدينا

نتلوى بهالبردات

ندّور تانجمع حطبات

مهما احمرو هالجمرات

غير نورك ما يدفينا

من طرف زايد السبت 20 فبراير 2010, 6:45 pm

قبلك كان يومي شهر

وشهري سنة

وبعدك احلوت بعيوني الدني

صرت أنطر

صوت بقلبي يرن

وقلبك ع صدري يعن

بشجن دافي

ويقول لا تصدق شفافي

خليك ع حبل الهوى غافي

بحبك متل ما بتحبيني..

وأكتر

ومع كل همسة بتهمسا..

بسكر

حبي إلك

متل ما لون السما زرقا

متل ما التلج أبيض

ومتل ما لون ورق الشجر أخضر

حبني.. حبني.. حبني

بوس خدودي

واضغط على هنودي..

خلي النمل يسري

من روس صابيعي

لقرمة زنودي..

وين صابيعك؟

اغرزها بدفا شعري

وع مهل مشيها

وتتسكت شفافي

بشفافك إلهيها..

وخليها..

تقول شوفيها..

بيحبني واشتهى بوسه

صحة ع قلبو

ما دامني بحبو

خدني بصدرك شي سنة

ضمني .. ضمني

وطير لأبعد مدى

وغني معي صوت وصدى

الحب فاكهة الدني

وحبنا ما بينتهي حتى الردى.*

طل القمر

طل القمر صدفي

والهم بعيونو

دغري لهف قلبي

ع نغمة جفونو

وصار يضرب بقلبي

بدو يهجرو

ويسكن بصدرا

هيك بيصير

وأنا.. بشو رح عيش؟

من غير شي

عايش مع الأيام بالتدفيش

اتلفت صوب القمر حاكيه

شفت القمر زعلان

قلت كيف بدي أرضيه؟

رح وشوشو شويه همس

وقلو الشمس

بتغيب وبترجع

هيك الدني

شمس وشتي

فرح وبكي

من يوم الله كونا...

متلك أنا ناطر

وصرلي سنين

تمشي السني خلف السني

وترجع ليالي الولدني

وقطف ورد من جنة خدودك

وزين شفافي بالندي

العايم على نهودك

واتعربش شويه

تا طول هالشفاف

وارشفا

واشبع دفا

ونط بعدا اختفي

بغابة ورا جفونك

أو غوص

بالبحر الهايم على عيونك

واغرق.. وموت..

يا هل ترى في بالسما

جنة أحلى من عيونك.

متل القدر

متل القدر

جيبتي

ع القلب نايم... وحدو غفيني

فاق القلب ع صوت نهداتك

تقولي سكر من عطر آهاتك

وصار يترنح ع البواب

يطلب اثر محل ما يمشي

وفجأة صحي وشاف حالو بالحلم

صدرك يضمو

وعطرك يشمو

وداق العسل ع شهد أمو

وصار يصرخ خلي الدني تسمع

بصوت أقوى من المدفع

بحبك.. بحبك.. بحبك

يا ريت أبقى لعيونك متل هدبك

ونام على زنودك واغفا

ومن وهج صدرك طول العمر أوفا

بيكفي قديش عشت الزمهرير

بترضى عيونك تنحرم مني وموت ع بكير

لو تبعدي لحظة.. رح موت.. والحلم رح بيطير.

كلمة حب

وين بشوفك ما بعرف

احترت وحارو عيني

بغمض حتى احلم فيك

حاملني وطاير فيي

قالوا حبك متل الورد

بيدبل بسرعة وبيزول

وقالوا عنو متل البرد

اللي بيسرق نسمة أيلول

مهما يقولوا عنك نار

ويقولوا عنك غدار

عتم الليل بشوفو نهار

لو تسكن بعيني

حبك غافي بقلبي

متل الطفل اللي بعدو صغير

ساعة بغطيه بهدبي

ساعة بخاف عليه يطير

وبقعد أدعي ل الله

لو يبقى صغير انشا الله

يخلي البسمة تتحلى

ع شفافي وبعيني.*

الوردة

شو خجلت هالوردة منك

لما وقفت لحظة قبالك

شافت حالا كتير صغيرة

وراحت تتخبى بخيالك

عطرك أحلى من عطرا

وعمرك أطول من عمرا

ما عندا السحر ال بعيونك

ولا واحد متلي مجنون

بيغار عليك من خيالك

حتا تزعل حتا تغار

حتا تشعل متل لنار

ورمادا لو صوبك طار

رح يهمسلك يا نيالك

وهلق مين المذنب فينا

هالوردة عتباني علينا

أنا اللي جبتا وقدمتا

و بأيدي لأيدك سلمتا

وإلا أنت الحسنك طاير

ما بيعرف جبران الخاطر

خبي منو كنت شويه

وغطي عيونك هالسحرية

وبلا هالضحكة المجنونة

خليها كنت مدفوني

منعرف هالضحكة بتحلالك

انبسطي.. زعلنا الوردة كرمالك .*

تعودنا عليك يا شمس

تعودنا عليك يا شمس

رد: تعودنا عليك يا شمس